Biblioteca Verde, en colaboración coa Concellaría de Medio Ambiente, e con motivo do Día Internacional dos Bosques, organiza unha ruta interpretativa polo Río Mandeo ao seu paso por Betanzos e Coirós. Sen dúbida, un bo xeito de gozar dun percorrido pola arte e a cultura e descubrir os segredos da natureza no río Mandeo.

A Ría de Betanzos será o punto de partida, onde desemboca o Mandeo e se une co Río Mendo. Iremos percorrendo a parte urbana do río polo paseo da Ribeira, do Malecón, pasando pola Ponte Nova e pola Ponte Vella. Poremos rumbo río arriba pola senda que se adentra na parte de maior riqueza natural cara o Campo dos Caneiros para acabar chegando ao Coto do Chelo.

 Ao longo do percorrido as persoas asistentes estarán acompañadas por persoal bibliotecario e polas persoas expertos de Puertas Afuera,  que se encargarán de guiar e realizar as explicacións da actividade.

A dificultade da ruta é baixa e a súa  duración estipulada é de 2 horas, aproximadamente, contando a ida e a volta.

As persoas adultas poderán asistir con nenos e nenas maiores de 10 anos, que tamén necesitan inscrición.

O desprazamento da Coruña a Betanzos, en autobús, será gratuito. Sairemos ás 9.30 horas de San Pedro de Mezonzo e regresaremos a ese mesmo lugar ás 14:30 horas.