Olga Raíces viaxou de Venezuela a Santiago de Compostela aos once anos de idade. Aquí iniciou os seus estudos de canto para continualos, máis tarde, coas mestras Ana Fernaud, Marimí del Pozo, Teresa Tourné e Inés Rivadeneira en Madrid. Participou en cursos internacionais de canto e asistiu á cátedra de canto do Curso Universitario Internacional "Música en Compostela". Realizou xa varias xiras por América e Europa e gravou tres discos. Na actualidade traballa como mestra especialista en Educación Musical.

O coruñés Fernando Enseñat-Berea comezou os seus estudos de canto coa soprano María Luisa Nache. Despois dunha longa paréntese, proseguiraos coa mezzosoprano coruñesa Conchita Fraga e, xa en Madrid, coa soprano Josefina Arregui. Formou parte de diversas agrupacións corais galegas. Como solista interpretou música relixiosa nas catedrais de Mostar (Bosnia-Herzegovina), Estrasburgo e Valladolid, Igrexa da Natividade de Saverne (Francia), o Mosteiro de Poio, Los Jerónimos (Madrid), as Capelas Castrenses de Madrid, A Coruña e Estrasburgo, entre outras.

Julián Jesús Pérez naceu na Coruña no ano 1965. Doutor en Didáctica da Lingua e da Literatura pola Universidade da Coruña, posgraduado en Educación Musical pola Universidade Autónoma de Barcelona, titulado en piano, licenciado en Filoloxía inglesa, diplomado en Dirección Coral e profesor titular de Música en Secundaria. Fundou e dirixiu diversas agrupacións corais.

Non perdas o concerto Capriccio vocale, onde estes tres artistas unen os seus talentos na biblioteca, no xa tradicional Concerto de Nadal que este ano chega á súa novena edición.