O vindeiro luns 10 de Febreiro ás 19,00 h. temos na Biblioteca Municipal Forum Metropolitano a presentación do libro "Diario sen datas dunha aborixe galega" de Diana Varela Puñal, dentro do programa #LunsDeEncontros.

A obra está publicada por Edicións Laiovento, e foi escrita a modo de diario, desde unha perspectiva vivencial, sen ningún tipo de aspiración pretenciosa, na que se abordan os temas que máis lle preocupan á autora. O concepto de identidade, a poesía e a ética son os tres eixos sobre os que xiran estes textos, con distintas manifestacións dentro de cada unha das materias.

Diana Varela Puñal

Nacida en Corme, Costa da Morte, trasladouse ós catorce anos á Coruña, onde exerce na actualidade como avogada. Colaborou no diario Galicia Hoxe coa súa sección semanal Cartas boca arriba.

Despois de gañar o Premio Díaz Xácome, de Mondoñedo, no 2006 obtivo polo seu poemario Fíos o Premio Uxío Novoneyra das Pontes de García Rodríguez. En decembro de 2010 publica o seu segundo libro, Animal Abismo.

No 2011 presentou o poemario infantil ilustrado, As trovas de Midas, publicado en formato dixital coa voz da propia autora, e en papel.

En decembro de 2012 gañou o premio Estornela de Teatro, coa súa obra Arlequino Viceversa. Presentou a dramatización de dúas pezas de teatro: Lúa de Mel, e A morte é a túa voz ausente. No 2016 publica Midas, Leo e o paraugas, peza teatral para nenos.

No ano 2015 publicou a súa primeira novela, Fin de Festa.

No ano 2017 publicou Ouvre la lucarne, selección de poemas en galego-francés, e o seu último poemario ata a data, Non, amor.