É sobre esta conciencia da igualdade de xénero o que marca o rumbo para a construción desta pequena intervención teatral e así intentar axudar ás e aos espectadores a recapacitar e reflexionar sobre a figura da muller ao longo da historia e na actualidade, e a un tempo redescubrir, redimensionar e mesmo desmontar o vello tópico "detrás dun gran home siempre hai unha gran muller", remexéndoo para así mostrar e destapar o feito de que moitas mulleres son as responsábeis de grandes fitos históricos, grandes revolucións e grandes avances malia non teren sido recoñecidas no seu eido.

Reivindicando as mulleres que, nun mundo masculino e patriarcal, foron quen de facerse un oco por si mesmas e cunha chea de atrancos, sendo fortes para, non só utilizar armas masculinas, senón, e o que é máis importante, transformalas, así como tamén os seus roles, comportamentos, estilos de vida, dotándoos dun novo prisma, e abrindo un novo camiño, agardamos que sen retorno, para reflexionarmos e ir transformando a nosa sociedade nunha máis xusta e igualitaria. Para iso convidamos a mulleres do noso pais que forman parte da nosa historia agochada, intentando darlles vida e traéndoas ao presente, xa que existen, dun modo ou outro, a través de mulleres anónimas, e mesmo tamén reflectíndoas no futuro, intentando darlle sempre un punto de vista relaxado e buscando a comicidade tanto nas situacións que a súa historia nos puidera ofrecer como nas posíbeis relacións que se poidan estabelecer.

Actividade dentro do cliclo temático "O mundo en feminino"