Confiaban en que outra maneira de vivir era posible. Así que, quitaron os disfraces, as capas, as coirazas e a peito descuberto e a pel exposta lanzáronse á aventura.

Érase unha vez unha viaxe en bicicleta desde o norte de España ata o Círculo Polar Ártico. Unha viaxe protagonizada por dous humanos e un can, que atravesaron Europa vivindo sobre a estrada e baixo o ceo durante miles de quilómetros.

Esta é a historia real de Pablo, Ana e Hippie, que saíron de Asturias empuxados por unhas incontibles ganas de vivir. O seu destino, Cabo Norte, non é unha meta calquera; é un símbolo, un reto desafiante, unha declaración de intencións. Nas páxinas deste libro descubrirás, entre paraxes asombrosas e lúcidas reflexións, por que aquela aventura estaba destinada a cambiar as súas vidas para sempre.

A viaxe que estás a piques de facer transportarate a través de nove países, pero é tamén unha viaxe interior. Como os distintos afluentes dun río, que van compoñendo un torrente caudaloso e salvaxe, o relato flúe cara a un desenlace cargado de crúa sinceridade, profunda aprendizaxe e un contaxioso optimismo ante a adversidade.

Unha experiencia chea de significados que axuda a enfocar unha perspectiva da vida, antes borrosa. Un libro repleto de emoción, valentía e loita que quizá esperte en ti un intenso desexo de liberdade.

Expedición Cabo Norte: Unha viaxe real cara ao interior do Círculo Polar de Anina Anyway e Pablo Calvo, publicado por Ediciones Desnivel.