Abril é un mes especial para a Biblioteca Verde porque é un mes no que teñen lugar dúas celebracións importantes:

• o Día do libro, o 23 de abril,
• o Día da Bicicleta, cada 19 de abril, co que se persegue promover o uso deste medio de transporte, chamar a atención sobre os dereitos das persoas ciclistas e destacar os seus beneficios para a saúde e para a mobilidade sustentable.

Para conmemorar isto, a Biblioteca Verde, en colaboración coa Concellaría de Medio Ambiente, organiza unha ruta pola cidade combinando un percorrido urbano e outro acompañado da natureza.

Esta é unha actividade dirixida para público adulto e poderán asistir nenos e nenas maiores de 8 anos sempre que veñan acompañados por unha persoa adulta. A inscrición é individual, co cal todas as persoas (maiores e menores) deben formalizar a súa propia inscrición. Se es unha persoa adulta e non dispós dunha bicicleta, a biblioteca, a través de BiciCoruña, préstache unha.

Ao longo do percorrido as persoas asistentes estarán acompañadas por persoal bibliotecario e polas persoas expertas, que se encargarán de guiar e realizar as explicacións da actividade.

A dificultade da ruta é baixa e a súa duración estimada é de 3 horas. O punto de partida e chegada da ruta é o Cantón Pequeno, fronte ao Quiosco Alfonso.