Os encontros darán comezo o próximo día 15 de outubro, cun recital tan cheo de conciencia e reivindicación como de boa poesía, ao que seguirán encontros mensuais ininterrompidos ata xuño do 2019.

Feministas, loitadoras pola dignidade dos pobos marxinados e activistas a favor da liberdade de expresión e a igualdade de xénero, Susana Sánchez Arins vén dende Cuntis e Joumana Haddad de Beirut.

A nacida en Vilagarcía é a autora galega do momento, logo de que o seu título máis recente,"Seique", acadara un enorme consenso crítico. Profesora, implicada en cooperación ao desenvolvemento dende unha perspectiva de xénero e de opción ortográfica reintegracionista, Sánchez Arins fai parte da plataforma de crítica literaria feminista A Sega. Consulta os materiais de Susana Sánchez Arins dispoñibles nas bibliotecas.

Pola súa banda, Joumana Haddad está considerada unha das mulleres máis influíntes do mundo árabe. Figura revolucionaria no Líbano polo seu activismo social e cultural, ademais de escritora é profesora universitaria, e unha afouta xornalista que adoita colaborar con medios que van dende The Guardian a Corriere de la Sera. Ademais, fala sete idiomas e desempéñase tamén como tradutora. Consulta os materiais de Joumana Haddad dispoñibles nas bibliotecas.

Coma sempre, unha libraría de proximidade poñerá á venda os títulos das convidadas, quen se ofrecerán a asinar exemplares.