Este encontro terá lugar o vindeiro luns 26 de novembro, e seguirano encontros mensuais ininterrompidos ata xuño do 2019.

Nesta ocasión coincidirán dous nomes cuxas raíces familiares se atopan no interior da provincia de Lugo: a fonsagradina Xiana Arias e o cubano Víctor Rodríguez-Núñez, donos de poéticas ben temperadas nas que conxugan memoria e pensamento.

Xiana Arias Rego naceu na Fonsagrada en 1983. Traballa como xornalista cultural na Radio Galega e forma parte da banda pop 'Atrás Tigre'.

Até o de agora, publicou os poemarios Ortigas (Espiral Maior, 2007) grazas ao Premio Xosé María Pérez Parallé, e Acusación (Galaxia, 2009). Títulos que están dispoñibles no catálogo da Rede de bibliotecas.

Con todo, textos seus aparecen tamén nos volumes colectivos Pirata (Brigadas de Intervención Rápida George Grosz, 2007), To the winds our sails. Irish Writers translate Galician poetry (Salmon poetry, 2010), Non conciliados. Argumentos para a resistencia cultural (Cineclube de Compostela, 2010), Capitalismo é um feito, revoluçom um direito (XXVI Festival da Poesía do Condado, 2012), Cantares para Rosalía (Consello da Cultura Galega, 2013), Novas de poesía (Fundación Novoneyra, 2014), Fanzine Cona Vol 1 No 1 (Cona, 2014), 6 poemas 6. Homenaxe a Federico García Lorca (Biblos, 2015) así como nas revistas Xistral, Dorna e, en moi pouco tempo, no segundo número da Revista Ligeia.

Recentemente participou como poeta do Festival dos Eidos no Courel e tamén no 'Polvorín de versos' de Chan da Pólvora, en Santiago.

Víctor Rodríguez Núñez (1955), nado na Habana de orixes galegas, é poeta, xornalista, crítico, tradutor e catedrático. Doutor en Literaturas Hispánicas pola Universidade de Texas en Austin, é profesor desa especialidade en Kenyon College, Estados Unidos.

Publicou dezaseis libros de poesía -case todos eles premiados e reeditados- os últimos dos cales son: Desde un granero rojo (2013), Deshielos (2013), Despegue (2016) ou El cuaderno de la rata almizclera (2017 e 2018).

Alén diso, compilacións da súa obra viron a luz en árabe, chinés, hebreo, inglés, italiano, francés, macedonio, serbio e sueco (e, seleccións algo menores de poemas, noutra ducia de linguas máis), así como en Arxentina, Chile, Colombia, Costa Rica, Cuba, Bolivia, Ecuador, España, Honduras e México.

Rodríguez Núñez ten amosado a súa obra en eventos literarios de máis de corenta países. En España recibiu os premios de poesía Renacimiento, Fray Luis de León (accésit), Leonor, Rincón de la Victoria, Jaime Gil de Biedma (accésit), Alfons el Magnànim e Fundación Loewe.

Durante os anos 80 foi xefe de redacción da revista cultural cubana El Caimán Barbudo, onde publicou numerosos traballos sobre literatura e cine. Preparou tres antoloxías que definiron a súa xeración, así como La poesía del siglo XX en Cuba (Visor, 2011). Ademais, traduciu poesía tanto do inglés ao español (Mark Strand, John Kinsella) coma do español ao inglés (Ida Vitale, Juan Gelman).

Coma sempre, unha libraría de proximidade poñerá á venda os títulos das convidadas, quen se ofrecerán a asinar exemplares.