En 1998, froito dun convenio entre o Concello da Coruña e a Universidade de Santiago de Compostela, establécese o inicio do Plan Director do Castro de Elviña. Coordinado polo Laboratorio de Arqueoloxía e Formas Culturais do Instituto de Investigacións Tecnolóxicas da USC, comezou a elaborarse un amplo documento que incorporaba un total de 42 especialistas e técnicos de moi distintas disciplinas: arqueólogos, arquitectos, historiadores, geógrafos, sociólogos, economistas, edafólogos, palinólogos, botánicos, enxeñeiros de obras públicas, comunicólogos, deseñadores ou informáticos.

Coordinado por Felipe Criado Boado, o Plan Director implicou unha profunda revisión histórica e arqueolóxica do xacemento, permitindo a recuperación de toda a información relacionada con Elviña e a elaboración de distintas hipóteses, liñas de investigación e estratexias de conservación, restauración e divulgación. O Plan Director sentou as bases dunha forma de comprender o patrimonio de Elviña, abarcando, máis aló da arqueoloxía, a súa perspectiva social, estética, cultural e turística, facendo fincapé na restauración e acondicionamento do castro e a contorna, na mellora de accesos e na correcta exposición dos materiais.

Debido as distintas conxunturas, o Plan Director nunca foi executado, aínda que moitas das súas ideas foron recuperadas e reinterpretadas en posteriores actuacións.