O xeneral inglés Sir John Moore (1761-1809) comandou as forzas británicas na península Ibérica durante a guerra da Independencia española (1808-1811).

A chegada das forzas napoleónicas a España e a necesidade de repatriación das forzas inglesas, esgotadas polo inverno, polo desabastecemento e por outros problemas de campaña, levárono a ordenar a retirada da Coruña para embarcar rumbo a Inglaterra.

Moore conseguiu unha vitoria, defendendo a retirada das súas tropas, que pagou coa súa propia vida. Cun exército decimado e en derrota causou grandes baixas nos franceses e proporcionoulles aos seus homes un triunfo moral de resistencia.

Unha bala de canón feriuno de morte e o seu inimigo na batalla, o mariscal Soult, deulle sepultura con honra. Os seus restos descansan nos xardíns de San Carlos da Coruña.