As primeiras evidencias de interacción entre Elviña e outras culturas documéntanse arredor do s. V a.C., con materiais que proceden desde Gadir (Cádiz) e dos que destaca a existencia de ánforas de viño. O predominio do comercio gaditano e das ánforas de viño guiará o comercio con Elviña durante toda a súa ocupación.

O fluxo de materiais máis destacado sitúase entre os séculos III e I a.C., coincidindo co período de apoxeo do poboado. A presenza destes materiais non só sinala a relevancia das interaccións con outras comunidades, senón un fito excepcional no campo das dinámicas comerciais do territorio galaico: hoxe en día, Elviña é o único nodo de interacción existente ao Norte do Ulla que establece unha interacción sólida cos navegantes mediterráneos durante a Idade do Ferro (coa excepción do castro asturiano de Campa Torres). Da mesma forma, as ánforas de viño representan a maioría dos elementos identificados, a pesar de que tamén se documentan recipientes de produtos exóticos (como os froitos secos) e recipientes de uso relixioso, sen esquecer as cerámicas finas de servizo de mesa. De entre estas, destaca a introdución da cerámica campaniense, cuxa área de produción orixinal era a Península Itálica e a illa de Sicilia, pero que puideron chegar, tamén, de forma indirecta a través dos navegantes gaditanos.

Boa parte destes materiais chegaba a través do espazo portuario identificado na península coruñesa. Este enclave non só supoñía un espazo de chegada e intercambio de materiais, senón tamén de consumo, pois a actividade comercial non só implicaba intercambiar bens, senón tamén ritos relixiosos, grandes banquetes e actos de carácter colectivo.

Tras a conquista romana, Elviña experimentou unha certa decadencia e as importacións canalizaríanse cara o novo asentamento de Brigantium . A conquista romana e o asentamento dun poboado de nova planta implicarían cambios na elección do gusto, coa chegada de ánforas olearias e de salgaduras, que reducirían o peso porcentual que anteriormente copaban as de viño case por completo. No referente ás cerámicas finas, destaca a importación de cerámica de paredes finas, engobada lucense e, por suposto, terra sigillata.