A nova e inocente presentadora do tempo dun telexornal de máxima audiencia tamén é 'casualmente' a amante do presidente da canle de televisión. Marisol (Marta Hazas), soña con converterse en actriz. E Adolfo (Carlos Sobera) decide cumprir o soño da súa 'noiva'. Para iso contrata os servizos dun mediocre aspirante a director de cinema (Javier Veiga). Adolfo está disposto a producir unha longametraxe con Marisol como protagonista. Aínda que non está claro se quere que ela triunfe, ou que a película sexa un fracaso estrepitoso, para que Marisol, desencantada, volva aos seus brazos para seguir sendo a súa "moza do tempo" e a súa "moza pasatempo". Max intentará salvar a súa película. Marisol intentará salvar o seu soño. Antonia intentará salvar o seu traballo. A muller de Adolfo, Pilar, intentará salvar o seu matrimonio. E Adolfo... intentará salvar o seu cu. Todos ocultan algo, todos queren algo do outro e ninguén se fía de ninguén... Pero mentres tanto, empézase a rodar a película: '5 y Acción...!!!'.