O concelleiro de Culturas, Deporte e Coñecemento, José Manuel Sande, presentou esta mañá no Pazo de María Pita a programación de outono dos ciclos Todo Público e Sen Numerar, dúas propostas de artes escénicas que acollerá a partir do mes de outubro o Fórum Metropolitano. Tal e como fixo constar o edil, esta programación, que complementa a actividade de artes ao vivo que se ofrece desde a área de Culturas a través de iniciativas Bebescena, Fórumáxico ou Ilusiooóh!n, "son dous dos activos fundamentais da programación escénica da cidade". Tanto Todo Público, dirixido a públicos de todas as idades e que contará coa estrea de obras de compañías locais, como Sen Numerar, teatro de pequeno formato e que complementa a programación que ofrece o Ciclo Principal do Teatro Rosalía Castro, "dan boa conta da efervescencia cultural que está a vivir a cidade", sinalou Sande.

Así, o próximo 7 de outubro, coa representación de Goldi Libre, do Grupo Chévere, dará comezo a programación de Sen Numerar, que este ano terá a temática social como fío condutor. "Esta tempada presentamos varios espectáculos que, aínda que non deixan de estar implicados na realidade actual, ofrecen diferentes puntos de vista para reflexionarmos e mesmo rírmonos", explicou Begoña Llamosas, directora do Fórum Metropolitano e responsable da programación escénica presentada esta mañá. Tras a estrea da obra que recolle a propia experiencia persoal e testemuño do actor César Goldi tras o seu paso polo cárcere da Coruña, chegará na fin de semana do 27 e 28 de outubro a representación de Mosca, de Sudhum Teatro, un traballo que trae a escena o acoso escolar. Xa no mes de novembro, o día 10, o ciclo programará Helena, xuízo a unha lurpia, un traballo de Miguel del Arco no que a compañía Teatro do Atlántico, baixo a dirección de Xulio Lago, e con María Barcala no papel de Helena, reivindicará a dignidade da muller. Finalmente, o sábado 25 de novembro, Alberto San Juan levará ao Fórum Metropolitano a peza España Ingobernable, unha iniciativa na que, coa compañía de Fernando Egozcoue, o artista porá de manifesto, a través de textos e cancións, a loita cidadá na historia do Estado, desde a segunda República até a actualidade.  

Como é habitual, as representacións de Sen Numerar tamén terán lugar en horario lectivo para o alumnado de educación secundaria e Bacharelato da cidade. A actividade recibiu este ano preto de 11.000 solicitudes, segundo indicou Llamosas durante a rolda de prensa. "Iniciativas como este ciclo permiten achegar a todos os públicos, en particular á mocidade, as artes escénicas dun xeito máis próximo, nun ambiente case íntimo", destacou.

Por outra banda, o próximo 21 de outubro dará comezo a programación de outono do ciclo Todo Público, a programación de artes escénicas para todos os públicos que ten como finalidade, segundo incidiu a directora do Fórum, "en ofrecer as rapazas e rapaces, a partir dos tres anos, a oportunidade de internarse en mundos artísticos e vivir unha experiencia emotiva a través de espectáculos teatrais de gran calidade, co obxectivo de favorecer o desenvolvemento do seu pensamento creativo". A programación, que tamén ofrece pases para o alumnado de centros educativos en horario lectivo e na fin de semana para todos os públicos, contará coa estrea de traballos das compañías locais Caramuxo Teatro e Pérez&Fernández.

Deste xeito, Todo Público comezará o venres 6 de outubro coa estrea de Ela, un traballo de Caramuxo que crea un mundo fantástico a través das cores, a arte e o universo creativo da pintora Maruxa Mallo. Na semana seguinte, na festividade do 12 de outubro, o Fórum programará a estrea tamén de Aguratrat!, a adaptación de Pérez & Fernández do conto Esio Trot, de Roald Dahl. A continuación, o sábado 21, terá lugar a representación de Malas Palabras, da compañía arxentina La Galera Encantada, mentres que o día 28 será a de Bala Perdida, da galega Títeres Cachirulo. Esta última trasladarase, excepcionalmente, ao centro Ágora.

Xa no mes de novembro, o día 4, Todo Público ofrecerá Retahilando, de Eugenia Manzanera, traballo que vén de recibir o Premio ao mellor espectáculo de pequeno formato Fetén 2017. Finalmente, en decembro, a compañía Zum-Zum Teatre presentará La gallina de los huevos de oro o sábado 2, mentres que La Pera Limonera ofrecerá o espectáculo Lágrimas de Cocodrilo o sábado 16. Todas as representacións deste ciclo terán lugar ás 18.30 horas.

As entradas para os dous ciclos xa están á venda nas canles habituais, e poden adquirirse, por 6 euros --2 euros no caso das entradas para menores de tres anos do ciclo Todo Público--, no despacho central de billetes da praza de Ourense (de luns a venres, agás festivos, de 9.30 a 13.00 horas, e de 16.30 a 19.30 horas), a través de www.ticketea.com ou do teléfono 902.044.226 (de luns a venres de 9.00 a 22.00 horas, sábados de 14.00 a 22.00 horas e domingos de 16.00 a 21.00 horas) ou no Fórum Metropolitano o propio día da representación desde unha hora antes, sempre e cando queden entradas dispoñibles. No caso de Sen Numerar, o día da función o prezo será de 9 euros, agás para as persoas desempregadas, maiores de 65 ou posuidoras do Carné Xove, que aboarán 7 euros por cada espectáculo.  Ademais, tal e como é habitual noutros ciclos de artes escénicas para todas as idades, Todo Público ofrece a posibilidade de adquirir o Abono 3, tres entradas para a mesma función, por 15 euros.