A partir da coñecida revista histórica L'architecture d'aujourd'hui, Regina Giménez desenvolveu un proceso de traballo que analiza os elementos publicitarios e modifícaos de maneira que cambian totalmente o seu significado.

A través dun exercicio de abstracción, desvela a súa composición gráfica e ofrece outra lectura dunhas imaxes vinculadas á publicidade dos novos materiais de construción da época.

A galería Vilaseco, conta para a presentación do proxecto expositivo coa arquitecta Naiara Montero, que xunto coa artista charlarán sobre arte, deseño e arquitectura e presentarán a publicación L'architecture d'aujourd'hui de Regina Giménez editada por Enric Farrés Duran para o proxecto editorial Los Cinco Delfines (Barcelona, 2015). Con motivo da mostra, Laboratorio Creativo Vilaseco xunto á creadora realiza dúas edicións especiais.

Unha edición de 70 exemplares da obra Dalami, en impresión giclée de tintas pigmentadas sobre papel art smooth 220 gr. numerados e asinados pola artista.

E unha alfombra baixo o título Ciatherme, edición de 5 exemplares, formato 300 x 200cm tecida á man por artesás con la 100% orgánica. Regina Giménez (Barcelona, 1966) vive e traballa en Barcelona. Licenciada en Belas Artes, presentou exposicións individuais en Barcelona, Madrid, Bruxelas, París, entre outras cidades, ademais de participar regularmente en feiras nacionais e internacionais.

A súa obra está presente en numerosas coleccións privadas e públicas.