O concelleiro de Culturas, Deporte e Coñecemento, José Manuel Sande, inaugurará no Pazo Municipal de María Pita mañá xoves, ás 20.00 horas, a exposición Doroteo Arnáiz. Memorias de grafito e tinta, unha escolma de 29 obras do debuxante madrileño que se poderá visitar até o próximo 23 de abril. A exhibición compila parte da traxectoria do autor, desde os seus primeiros anos como artista en Madrid e París, na década dos sesenta, até as súas creacións máis recentes.

Arnáiz foi director da Calcografía Nacional de Madrid entre os anos 1980 e 1985 e, posteriormente, impartiu clases de gravado na Facultade de Belas Artes de Pontevedra, desde 1995 até o ano 200. Foi premiado a nivel internacional e realizou máis de 70 exposicións individuais, e 150 colectivas, en galerías de todo o mundo. A súa obra está presente en espazos como o MOMA de Nova York, ou en centros de arte contemporánea de Chicago, París ou Quebec.

A exposición Doroteo Arnáiz. Memorias de grafito e tinta estará aberta ao público todos os días de 12.00 a 14.00 horas, e de 18.00 a 21.00 horas.