Exposición formada por unhas corenta obras, da colección Gas Natural Fenosa, -entre as que destacan algunhas de moi recente adquisición- e centrada no tema da figura humana. "Os rostros do naufraxio", que así se titula, formúlase como unha antoloxía de "post retratos" e "anti retratos". É dicir, como un percorrido polas distorsións que a experiencia contemporánea introduciu nos vellos clixés deste xénero, establecidos no occidente cristián hai máis de 500 anos. Ao mesmo tempo, "Os rostros do naufraxio" funciona como un mostrario da infinidade de recursos técnicos e enfoques discursivos que se encontran ao alcance dos artistas plásticos nestas primeiras décadas do século XXI. Obras de artistas como Esther Ferrer, Pilar Albarracín, Isabel Rocamora, Pere Formiguera, Pérez Siquier, conforman estes rostros.