Retratos e outras ficcións na Colección ”La Caixa” de arte contemporánea reflicte unha das coleccións máis importantes de Europa consagrada á creación do noso tempo. O tema escollido resulta especialmente adecuado: as metamorfoses da identidade, nun mundo cambiante que perdeu as antigas certezas. Os/as artistas interróganse sobre emocións e convencións da identidade, memoria e máscara. A exposición, comisariada por Nimfa Bisbe, reúne unha serie de grandes artistas internacionais: Ana Laura Aláez, Janine Antoni, Juan Navarro Baldeweg, Jean-Michel Basquiat, Christian Boltanski, Victoria Civera, Rineke Dijkstra, Marlene Dumas, Esther Ferrer, Günther Förg, Curro González, Stefan Hablützel, Roni Horn, Sharon Lockhart, Pedro Mora, Vik Muniz, Óscar Muñoz, Bruce Nauman, Carlos Pazos, Cindy Sherman, Antoni Tàpies, Gillian Wearing e Sue Williams. Debuxo, pintura, escultura, vídeo, fotografías e instalacións. A selección ilustra o método transversal da Colección "La Caixa" de arte contemporánea que arrinca na década dos anos oitenta e chega ata os/as mozos/as creadores/as de hoxe: un conxunto de artistas de todas as nacionalidades, estilos e tendencias. Fronte ás identidades inmutables do pasado, retratos e outras ficcións na Colección ”La Caixa” de arte contemporánea permítenos descubrir maneiras de ser e de vivir no diálogo, na interrogación, na procura ou no conflito: itinerarios persoais que se ofrecen xenerosamente como referencia e guía para a vida colectiva.