A mostra reúne máis de 20 óleos sobre lenzo a través dos que o artista nos ofrece a súa particular homenaxe ao mar.

Engulido. Esa é a primeira sensación que tiven ao enfrontarme a este proxecto. Sentirme engulido. Superado por momentos ao traballar as obras, non sabendo se sería capaz de acabalas, absorbido por cada cadro, obsesionado por cada pincelada, cada matiz e ton. A intres eufórico por conseguir o resultado que buscaba, a intres esgotado e abatido polos formatos, pola composición? creo que pasei por todos os estados de ánimo existentes. Sentíame como batido por unha onda xigante, revolto pola marea, devolto á beira e arrastrado de novo ao mar. Poseidón engulírame, era o reto. O meu RETO. Miralo de fronte, pausado e enfrontarme a el, entregarlle as miñas ofrendas e a min mesmo en corpo e alma, ofrecerlle a miña veneración. Espero telo honrado.

Raúl Álvarez