Este venres, 3 de agosto, ás 20,00 horas, na Sala da Asociación de Artistas Plásticos Galegos, ARGA, inaugúrase a Exposición "VOLVER" que reúne dezaoito esculturas de Cristina Sánchez, realizadas entre 1993 e 2018. Pasaron vinte e cinco anos entre as primeiras pezas "Sentimientos", "A contramano", e as últimas "Adversidad", "Unidos"... pero todas teñen en común o material sobre o cal a artista traballa: arxila refractaria chamotada; e fundamentalmente a temática que aborda: os vínculos e os sentimentos profundamente humanos que se reflicten neses rostros, neses corpos, nesas historias que se descobren nesas figuras polifacéticas que esixen máis dunha mirada, que obrigan a pararse en diferentes ángulos para abarcar a complexidade do coexistente e o contraditorio.