Inés Rey asistiu esta mañá á presentación aos medios da peza teatral Fariña que se estreará o vindeiro 25 de outubro no Teatro Colón e que xirará despois polos auditorios das principais cidades de Galicia.   

A alcaldesa Inés Rey mostrou a súa satisfacción pola estrea na cidade dunha peza teatral que "pon o foco nunha lacra social, a droga, nunha xeración perdida e na loita dun grupo de nais e pais devastados pola perda dos seus fillos".

O libro e agora a obra teatral, dixo, reflicten unha realidade, que deixou un regueiro de dor en Galicia e que dá luz sobre un dos momentos históricos máis duros e complexos, desde o punto de vista social, na nosa terra. "Unha obra que, ademais, tivo que lidar coa censura e a prohibición", lembrou.

Fariña é un libro que botou luz sobre o tema da tolerancia social que existía sobre o narcotráfico e denunciou a amparo político que houbo neses anos, sinalou a alcaldesa, ao tempo que felicitaba o autor, o elenco de actores e actrices, o director e produtores por levar agora a obra aos escenarios.  

O autor de Fariña,, e tamén produtor da obra, Nacho Carretero cré que esta adaptación ao teatro achega "un punto de vista máis próximo, máis familiar" e que a súa intención e a do equipo é a de "facer cultura dun capítulo moi escuro da nosa historia". 

 A adaptación escrita por José Luis Prieto e dirixida por Tito Asorey conta cun elenco formado por Xosé A. Touriñán, Marcos Pereiro, María Vázquez, Sergio Zearreta e Cristina Iglesias.  

O grupo Novedades Carmiña será o encargado de lle poñer voz á banda sonora da peza teatral cunha versión que xa se pode escoitar en Youtube.   

As entradas para o espectáculo teatral de Fariña xa están á venda no despacho de billetes do Teatro Colón así como nas canles de venda habituais. Para máis información, pódese visitar a web www.teatrocolon.es.