O Goberno local levará a cabo o acondicionamento do entorno do Aquarium Finisterrae, no que se realizarán obras de mellora de accesibilidade, urbanización e integración na paisaxe. O concelleiro de Rexeneración Urbana, Xiao Varela, indica que esta actuación "está pensada para proporcionar uns mellores accesos ao museo científico, cunha nova mobilidade no seu entorno que estea pensados para todos e todas, e tamén unha experiencia máis completa grazas ao acondicionamento de áreas de esparexemento no seu exterior".

As obras, que terán un tempo de execución de oito semanas, foron adxudicadas nun procedemento aberto que situou o prezo de adxudicación en 103.939 euros. Esta intervención abordará a adecuación ambiental do entorno e o acceso e a accesibilidade da senda litoral e completará a urbanización da parte traseira do edificio. Así, levarase a cabo a repavimentación, con formigón e céspede, do camiño de entrada entre o aparcadoiro e o edificio e se creará unha nova vía entre este espazo e a explanada norte do museo. Na senda peonil existente no bordo litoral vaise colocar unha rampla que garanta o acceso das persoas con mobilidade reducida e, na súa zona final. Ademais, crearanse zonas de esparexemento, con céspede e especies arbóreas adecuadas ao ambiente mariño e arbustos autóctonos, así como terrazas de madeira adaptadas á xeografía do entorno entre a rampla e o aparcadoiro. En todas estas obras se terá en conta unha correcta integración dos elementos no ambiente.

A empresa encargada da actuación manterá en todo momento o acceso, tanto peonil como de vehículos, ao museo, para o que se sinalizarán os traballos e os lugares de paso acondicionados.