21 de decembro de 2018
As persoas interesadas en colaborar na actividade, que terá lugar o 5 de xaneiro, pódense apuntar desde hoxe a través da portada do web municipal www.coruna.gal
A Concellería de Culturas, Deporte e Coñecemento abre hoxe o prazo de inscrición para solicitar a participación na Cabalgata de Reis municipal que se celebrará o vindeiro 5 de xaneiro. Este ano ofreceranse 251 prazas, que se adxudicarán mediante sorteo, para nenas e nenos de idades comprendidas entre os 7 e os 10 anos, que se subirán ás carrozas e trens que percorrerán as rúas da cidade.
A inscrición poderase realizar a través dun formulario que se atopará na portada da páxina web municipal, www.coruna.gal, no que deberán facilitar os seus datos de contacto e autorización para que a súa imaxe poida ser empregada durante a súa participación. A Concellería de Culturas lembra que se poderán inscribir todas e todos os menores nados nos anos 2008, 2009, 2010 e 2011. O prazo para formalizar a solicitude estará aberto até as 14.00 horas do luns 24 e poderase prolongar, en días sucesivos, no caso de contar aínda con prazas dispoñibles. O Concello, a través do Instituto Municipal Coruña Espectáculos (IMCE) --que lembra que só se validará unha inscrición por nena ou neno--, asignará a cada solicitude o seu número correspondente, que se empregará no sorteo que terá lugar o 28 de decembro, ás 12.00 horas, no Coliseum da Coruña, que permitirá determinar a localización no séquito das e dos participantes, así como adxudicar as prazas no caso que as solicitudes excedan a oferta de prazas dispoñible.
Unha vez finalizada a adxudicación, comunicaráselle ás persoas interesadas --mediante correo electrónico ou por teléfono-- a súa situación na cabalgata, así como a información necesaria para participar nela: lugar e horario de presentación do día 5 de xaneiro e horario e forma de recollida dos e das menores na praza de María Pita, unha vez finalizada a Cabalgata e o Saúdo Real. Esta folla informativa, que estará dispoñible en www.coruna.gal, deberase presentar cuberta e asinada xunto as normas --que son de obrigado cumprimento-- o día 3 de xaneiro, entre as 16.30 e as 20.30 horas, no Coliseum --porta de prensa--. A organización asignará un resgardo que se deberá presentar o propio día da Cabalgata. Unha vez cubertas todas as prazas dispoñibles, crearase unha lista de espera para cubrir baixas ou novas necesidades.
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible