Nesta edición, os concertistas que nos deleitarán coa súa cultura musical e nos farán viaxar coa súas interpretacións, veñen da Arxentina, Colombia, Italia, Rusia e Portugal.

Durante os encontros amosarán a súa diversidade cultural e musical en colexios públicos, privados e concertados, institutos, conservatorios e diversos auditorios tanto da cidade como da provincia da Coruña; polo que percorrerán dende o 2 ao 7 de outubro os concellos de Arzúa, Bergondo, Betanzos, Cambre, Carral, Culleredo, Mugardos, Negreira, Noia, Oleiros, Padrón e A Coruña.

Dende a Asociación Cultural Pórtico das Artes, co apoio da Consellería de Cultura e Educación da Xunta de Galicia, da Diputación Provincial A Coruña e Concello A Coruña , sentímonos felices de traballar a prol da divulgación cultural musical dos pobos do mundo, para podérllela achegar á cidadanía e sobre todo ás nosas nenas, nenos, mozas e mozos.

Agradecemos dende aquí ás nosas autoridades a sensibilidade demostrada ao apoiar esta iniciativa, que esperamos que axude a unir sensibilidades en favor da educación, convivencia, cultura, cidadanía global e coñecemento na diversidade, así como a todas as persoas que dun xeito ou doutro teñen contribuído a que este evento sexa unha realidade.

Xa só nos queda animar a cidadanía a que goce da festa da linguaxe universal: a música; que se contaxien da ilusión por coñecer novas culturas, realidades e tradicións que este singular evento ofrece, preparado con moita ilusión e esforzo.

*Concerto co apoio do Concello da Coruña, a través da Concellería de Culturas, Deporte e Coñecemento