Concello da Coruña

Concello da Coruña

Cando:

16 de febreiro de 2018

O Concello da Coruña asumirá a partir deste verán a xestión do Teatro Colón en base a un convenio coa Deputación “que posibilita integrar este simbólico recinto na rede pública de espazos culturais da cidade”

O alcalde, Xulio Ferreiro, salientou que “o anuncio desta cesión temporal, pero con vocación de continuidade, evidencia que a colaboración entre institucións é posible e deriva no beneficio da cidadanía tanto da Coruña, como de toda a área metropolitana”

O alcalde da Coruña, Xulio Ferreiro, ratificou este venres que o Concello da Coruña asumirá o próximo verán a cesión temporal da xestión do Teatro Colón en base á firma dun convenio coa Deputación da Coruña, ente que posúe a titularidade deste equipamento, que quedará "plenamente integrado na rede pública de espazos culturais municipais". Así o manifestou o rexedor nun acto no propio Colón xunto ao concelleiro de Culturas, José Manuel Sande, e o presidente e a vicepresidenta da Deputación coruñesa, Valentín González Formoso e Goretti Sanmartín. O primeiro edil coruñés salientou "que hoxe é un día para felicitarnos, xa que poñemos os vimbios para un traspaso temporal, pero que ten vocación de permanencia, e que derivará nun reforzo e impulso da programación cultural". "O anuncio que hoxe facemos demostra, unha vez máis, que cando dúas administracións traballan de forma cooperativa, a cidadanía se beneficia no seu conxunto", dixo, á vez que recordou outros proxectos en marcha entre a administración local e o ente provincial, como a renovación das cubertas de Riazor, o carril bici metropolitano ou a oferta do viveiro de empresas do Papagaio.

Ferreiro indicou que este acordo de cesión servirá "para dar un impulso a un equipamento especialmente simbólico non só dentro da cidade, senón para toda a área metropolitana". "Con este compromiso, o de impulsar e abrir á cidadanía a programación cultural deste espazo, estamos dando servizo non só á veciñanza da cidade, senón a toda a área e a provincia, polo que cómpre felicitármonos deste traballo conxunto", indicou o primeiro edil.

Ao fío, o presidente da Deputación, que apuntou que "o de hoxe é un gran día para toda a provincia", comentou que "non ten sentido que dous equipamentos culturais, como o Colón e o Rosalía, situados a menos de 100 metros de distancia, compitan entre elas e non oferten unha programación complementaria".

Reordenación de espazos e aportación anual

A e os representantes políticos trasladaron a vontade das dúas institucións de que a cesión de uso se produza a partir do próximo 2 de xullo, e se estabeleza no marco dun convenio que, entre outros termos, estipulará a creación dunha comisión de seguemento conformada por representantes tanto do Concello como da Deputación. "Este ente fará unha análise da programación que, na mesma liña que até o de agora, manterá a súa aposta pola cultura e o fomento da lingua propia, así como traerá espectáculos de calidade e de referencia", salientou a vicepresidenta da Deputación, que indicou que o convenio estipulará tamén que o ente provincial realizará unha achega anual de 500.000 euros, para colaborar no mantemento e programación deste equipamento. Ademais, a Deputación reservarase o uso do Colón durante 30 días ao ano "co obxectivo de dar servizo a aqueles tanto a entidades do tecido social coo a concellos da provincia de menor tamaño que necesiten facer uso destas instalacións".

Pola súa banda, o concelleiro de Culturas, José Manuel Sande, explicou que "con esta cesión, o Teatro Colón convertirase, de facto, no quinto recinto xestionado polo IMCE, xunto ao Coliseum, o Teatro Rosalía, o Fórum e o Ágora". "Queremos deixar patente a nosa satisfacción por ter acadado un acordo que permitirá que un espazo tan significativa poida contar cunha programación específica ligada ao do resto de equipamentos públicos da cidade". A cesión da xestión do Colón derivará, a súa vez, nunha "reordenación xeral da programación de cada recinto do IMCE, así como nunha revisión do propio ente municipal, que experimentará un reforzo do seu persoal de cara a poder dar a cobertura precisa as novas necesidades que xurdirán". O titular de Culturas indicou que, nesta liña, tamén está previsto "designar de forma inminente unha nova figura de dirección do IMCE".

Buscas algo concreto?

Datas

Escolla período ou rango de datas:

Dende:

Ata:

Opcións

Que che parece esta sección?

-101-101-101

Síguenos en

Tes un navegador demasiado antigo!

Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible

Iniciar sesión