A poeta e videocreadora Miriam Reyes naceu en 1974 en Ourense, pero aos oito anos emigrou cos seus pais a Caracas. Estudou Letras na Universidade Central de Venezuela e, máis tarde de volta na Península, licenciouse en Filoloxía Hispánica pola Universitat de Barcelona. Publicou os libros de poesía: Espejo negro (2001), Bella durmiente (2004), Desalojos (2008), Yo, interior, cuerpo (Antología poética) (Arxentina, 2013), Haz lo que te digo (2015) e Prensado en frío (2016), a carón de dous títulos que viron a luz en tradución ao portugués e ao italiano. Así mesmo editou e traduciu -para o Fondo de Cultura Económica- a antoloxía de poesía galega Punto de ebullición (2015), ademais de verter para o castelán poetas portugueses, galegos e cataláns contemporáneos. Foi bolseira de creación na mítica Residencia de Estudantes de Madrid entre os anos 2004-2005, e da Fundación Roquissar de Mallorca en 2013. Ten sido incluída en antoloxías estatais e internacionais, e mantén a páxina de escrita colectiva Prensándonos en frío. Desde o ano 2001 experimenta coa escritura audiovisual e mais o recital multimedia.

Celia Parra (Ourense, 1990) é poeta e produtora. Licenciada en Comunicación Audiovisual e Máster en Produción e Xestión Audiovisual, traballa para varias produtoras e especialízase en videopoesía como investigadora, docente e creadora. Os seus videopoemas teñen sido premiados e seleccionados en diversos certames de Europa, Estados Unidos e América Latina. Alén diso, é impulsora e produtora executiva de Versogramas, considerado o primeiro documental sobre o panorama internacional da videopoesía. Como poeta, publicou en 2009 o seu primeiro poemario, No berce das mareas, Premio Avelina Valladares. Froito da experimentación coa poesía híbrida, seguiríanlle no 2012 RE(C)verso, un CD autoeditado de audiopoesía e, no 2013, Poemario Culinario, un recetario de poemas e fotografías servidas en formato web. A súa obra poética viu a luz en revistas como Dorna, Luzes, Oculta Lit e xornais como O Salto Galiza. Forma parte das referenciais antoloxías da última poesía galega No seu despregar (2016) e 13. Antoloxía da poesía galega próxima (2017, en edición bilingüe galego-castelán), e actualmente traballa no que será o seu segundo poemario.