Turismo e fotografía. Català-Roca en Galicia 1956-1976 recolle 166 imaxes, algunhas delas inéditas, seleccionadas entre o milleiro de fotografías que Català-Roca tomou nas sucesivas viaxes que realizou a Galicia ao longo de 20 anos. Durante estas viaxes, o fotógrafo percorreu unha trintena de localidades repartidas por toda a xeografía galega.

Català-Roca viaxaba ao servizo de editoriais que publicaban as guías turísticas sobre España que se poñían entón a disposición dos turistas. A exposición recupera as imaxes asociadas a sete campañas que realizou entre os anos 50 e 70 por encargo da entón Dirección Xeral de Turismo.

Entre as imaxes seleccionadas, poden atoparse capturas de Santiago de Compostela, A Coruña, Noia, Ribadavia, Vigo, Betanzos, Lugo, Bueu, Sanxenxo, O Cebreiro ou Ourense, entre outras.