O Pazo de María Pita acolle dende hoxe a exposición de fotografías realizadas polo exdirector da Filmoteca Española Chema Prado titulada Vai e vem. A mostra está composta por imaxes relacionadas co mundo do cinema e que narran algunhas das lembranzas do que foi condutor da filmoteca durante preto de tres décadas. O concelleiro de Culturas, Deporte e Coñecemento, José Manuel Sande, será o encargado de inaugurar esta tarde xunto ao autor a mostra, que se pode visitar na sala de exposicións do Pazo de María Pita ata 19 de maio.

A selección de fotografías de Prado, que leva por título Vai e vem en referencia á película de João César Monteiro, xira en torno a personaxes vinculadas ao cinema retratadas de maneira próxima e persoal por Prado e tamén sobre os lugares, cidades e arquitecturas. A exposición, que se pode visitar de luns a domingo en horario de 12.00 a 14.00 horas e de 18.00 a 21.00 horas, está reflectida nunha publicación con formato de caderno de postais que van enlazando lembranzas e evocando a importancia da viaxe.

A exposición complementa ao ciclo de películas organizado polo Centro Galego de Artes da Imaxe (CGAI) para homenaxear a traxectoria de Prado e na que colabora o Concello da Coruña a través da Concellería de Culturas, Deporte e Coñecemento. Así, dúas sesións do ciclo terá lugar no Teatro Colón. O vindeiro venres 22, ás 20.30 horas, proxectarase O ceo protector, de Bernardo Bertolucci, que contará coa presentación de Chema Prado e do actor protagonista do mesmo, John Malkovich. O 26 de abril, no mesmo horario, o Teatro Colón acollerá o pase de Stop Making Sense, de Jonathan Demme. O acceso a ambos filmes será gratuíto ata completar o aforo.