A Dra. Pardo, investigadora do Sistema Nacional de Saúde Miguel Servet, e do Instituto de Investigación Sanitaria de Santiago de Compostela (IDIS), expoñerá que a obesidade constitúe na actualidade o maior problema sanitario a nivel mundial, adquirindo dimensións epidémicas ao lle afectar ao 13% da poboación adulta; estímase que a este ritmo podería acadar un 20% no 2025.

A obesidade é unha enfermidade que debe ser tratada como tal xa que está asociada a patoloxías cardiovasculares ou a diabetes tipo 2 entre outras, e a outras menos coñecidas como o desenvolvemento de varios tipos de cancro.

No Grupo Obesidómica do IDIS céntrase a súa investigación no estudo dos sinais liberados pola graxa e como varían en función do tipo de depósito e no desenvolvemento da obesidade co fin de atopar novas dianas terapéuticas para esta enfermidade. Nesta charla expoñeranse os achados do grupo neste ámbito, e conceptos xerais de hábitos saudables como a alimentación e o exercicio para previr a obesidade.