O certame premiará cun Prisma de Bronce os mellores traballos en oito categorías, acadando a maior diversidade de formatos da súa traxectoria. Son as modalidades de Vídeo, Novos medios, Texto inédito, Libro editado, Artigo xornalístico, Radio, Proxectos singulares e Prisma especial do xurado. Ademais, todas as modalidades, excepto a de Libro editado e a de Prisma especial do xurado, están dotadas cun premio de 4.000 euros.

Nesta trixésima segunda edición preséntanse varias novidades. Unha delas é a nova modalidade de Proxectos singulares de divulgación científica, que deberán demostrar unha ampla e diversa participación cidadá e o seu carácter singular, atendendo á diversidade ou novidade dos medios empregados para a súa execución.

Ademais, a anterior modalidade de sitio web/rede social redefínese nunha categoría denominada Novos medios, que premiará o mellor traballo nun sitio web, rede social, blog ou calquera outro formato en liña.

O prazo de presentación de traballos e candidaturas finaliza o 30 de xuño para a modalidade de libros editados, e o 31 de xullo para as demais categorías.