A alcaldesa Inés Rey acudiu á presentación no Real Club Náutico do programa Mares Circulares, impulsado por Coca-Cola, que chega este ano a Galicia cun amplo abano de actividades, que promoven a limpeza de residuos nas costas e fondos mariños, pero tamén a súa reciclaxe e reconversión en novos produtos dentro dunha economía circular que no caso da empresa ten xa resultados palpables.

No ano 2018, recolléronse a través do proxecto integral 26.171 quilos de residuos nas 2.252 hectáreas de traballo coa recuperación de elementos plásticos, a maioría relacionados coa pesca (redes, sogas, sedais...) e a agricultura (canles de rego, láminas, plásticos de invernadeiro...).

Mares Circulares contribuiu á conservación das reservas mariñas, concretamente, estiveron en dez do estado, dependentes do Ministerio de Agricultura, Pesca e Alimentación, e nunha dentro dun contorno natural portugués como é a Área Mariña Protexida Isla de San Miguel, das que recolleron máis de 8.300 kg de material contaminante. Actuaron igualmente en 82 praias grazas á colaboración de 5.000 voluntarios/as e 70 barcos cooperantes extraeron en doce portos da península preto de 6.700 quilos de basura mariña.

Tendo en conta que no ano 2050 se prevé que haxa máis plásticos que peixes nos océanos, o Concello apoia esta iniciativa que non se queda na recollida, senón que vai máis alá coa formación da rapazada en talleres centrados na sostenibilidade, nos que vexan cos seus propios ollos as posibilidades que teñen os residuos para ter unha segunda vida, outro dos puntos que se potencian tamén en empresas como Coca-Cola, coa reconversión de plásticos PET en novos produtos: "É unha prioridade deste goberno promover a economía circular, pero o que nos parece máis importante aínda é a formación das rapazas e dos rapaces para cambiar conciencias de cara a un futuro sostible", destacou a alcaldesa na presentación do programa.