O alcalde, Xulio Ferreiro, visita mañá, ás 12.00 horas, o Centro Oceanográfico da Coruña, que celebra a súa undécima edición da xornada de portas abertas, na que dará a coñecer os seus traballos de investigación. O persoal científico e técnico do centro estarán acompañando ao público durante a xornada, para poder explicar de maneira sinxela e próxima algún dos aspectos da ciencia relativa aos océanos.

Durante a xornada, que se desenvolve en horario de 11.00 a 14.00 e de 16.00 a 20.00 horas, haberá actividades propostas polo centro para afondar na vida mariña, a contaminación do medio ou a figuras de científicas relevantes como a de Ángeles Alvariño. Así, o público que se achegue poderá observar a vida mariña ao microscopios, ver unha exposición do equipamento tecnolóxico e descubrir como funciona un robot submarino no tripulado, coñecer as artes de pesca, a problemática dos descartes e os estudos de marcado e recaptura de peixes, descubrir a Ángeles Alvariño e a todas as mulleres que traballan ou traballaron no centro e experimentar coa composición do mar. Ademais, nas propostas hai lugar para concursos, como un de reciclaxe de residuos que se atopan no mar ou outro de debuxo para os nenos e as nenas, que terán unha serie de propostas infantís.