O Concello da Coruña participa esta semana na campaña estatal Recicla vidrio por ellas, unha iniciativa solidaria impulsada pola entidade sen ánimo de lucro Ecovidrio e que ten, como principal obxectivo, mobilizar á veciñanza na reciclaxe de envases de vidro para apoiar unha das fundacións implicadas na loita contra o cancro.

A campaña, que nace ao abeiro do Día Mundial do Cancro de Mama, o 19 de outubro, e na que participan máis de 60 cidades de todo o Estado, supón a instalación de dous contedores de recollida de este tipo de material na praza de Lugo. Por cada quilo de envases de vidro que a veciñanza deposite nos contedores, Ecovidrio procederá a doar un euro á Fundación Sandra Ibarra de Solidaridad Frente al Cáncer. Os colectores, que se poderán identificar a través dunha característica cor rosa, estarán dispoñibles para o depósito deste tipo de residuos até o vindeiro mércores, día 24.

Tal e como apunta a concelleira de Medio Ambiente, María García, esta iniciativa solidaria "pode favorecer tamén o incremento da concienciación respecto á separación en orixe de residuos". "A Coruña segue a dar pasos para mellorar a recuperación do vidro. Tan só no ano 2017 recicláronse un total de 3.567 toneladas deste material, o que supón unha media de 14,6 kg por habitante. Iniciativas como esta campaña poden impulsar ese aumento, á vez, da corresponsabilidade cidadá", advirte a responsable municipal.