CONTROL DE NORMAS DE CONVIVENCIA

- A Patrulla Verde da Policía Local denunciou á propietaria dun can de raza potencialmente perigosa que se escapara do seu domicilio e atacara a outro can, provocándolle a morte. Os feitos ocorreron o 13 de marzo, cando o animal, nun descoido da súa dona, accedeu á vía pública sen boceira, sen correa e sen ninguén que o custodiase e atacou a outro can que se atopaba atado no exterior dunha tenda mentres o seu propietario realizaba unhas compras. A dotación incautou e ordenou o traslado do can agresor ao Centro de Protección Animal, como medida cautelar de seguridade cidadá. No seu informe, a Patrulla Verde denunciou á propietaria do animal por catro infraccións: non adoptar as medidas necesarias para evitar que o can se escapase, poñendo en perigo a quen convive na súa contorna; circular cun can destas características sen boceira e sen correa; carecer de licenza municipal para pasear a este tipo de razas; non ter inscrito ao can no rexistro municipal. De todo isto deuse traslado á área de Medio Ambiente municipal, que remitirá unha parte destas infraccións á Consellería de Medio Ambiente, por ser da súa competencia.

- Na tarde do 23 de marzo, unha patrulla da Policía Local identificou a unha muller, de 55 anos, e ao home que lle acompañaban, por cortar ramas de árbores, unhas oliveiras, e introducilas no interior dun vehículo na rúa Revolución Francesa. Ambos foron denunciados por infrinxir a Ordenanza municipal de convivencia e lecer.

- Ás 03.55 horas do 25 de marzo, unha dotación tramitou unha denuncia aos moradores dunha vivenda da rúa Jacinto Benavente por celebrar unha festa con música a un elevado volume, perturbando o descanso da veciñanza e infrinxindo así a Ordenanza municipal de protección contra a contaminación acústica.

AUXILIO Á CIDADANÍA

- Ás 11.48 horas do 23 de marzo, unha patrulla foi comisionada pola Sala do 092 para que se trasladase ao Campo de Marte, onde unha persoa se desvanecera. Xa no lugar, a dotación localizou a un home tendido no chan ao que o persoal da Cruz Vermella lle estaba a realizar manobras de RCP. A patrulla proseguiu coa reanimación do home, de 91 anos, grazas ao desfibrilador que levaba no vehículo policial (DESA) e conseguiu manterlle as constantes vitais ata a chegada dunha ambulancia medicalizada do 061, que conseguiu estabilizalo.

DETIDO POR AGRESIÓN

- Ás 05.55 horas do 24 de marzo, unha dotación foi comisionada para que se trasladase ao Cantón Pequeno, onde ao parecer, uns mozos estaban a agredir a outro. Cando chegou ao lugar, a patrulla localizou a un grupo de mozos, que ao detectar a presenza policial, fuxiu en dirección saída da cidade, e viu como un deles propináballe unha patada a outro que estaba no chan. Un dos axentes quedou coa vítima, un mozo de 20 anos, que presentaba lesións visibles na zona labial, polo que solicitou unha ambulancia. E o outro axente, perseguiu ao agresor ata conseguir alcanzalo na zona do Obelisco. Este mozo manifestou que non fora el o causante das lesións, se non un amigo seu que se negou a identificar. O agredido recoñeceuno como o seu agresor, polo que este mozo de 20 anos, foi detido e posto a disposición xudicial por un delito de lesións. Unha testemuña dos feitos manifestou que foran dous os agresores, o detido e outro, continuando a Policía Nacional coa investigación da identificación do outro agresor.

INTERVENCIÓNS EN MATERIA DE SEGURIDADE VIARIA

- Un condutor foi denunciado por estar implicado nun accidente de tráfico, sen feridos, da clase "contra obstáculo fixo" e por darse á fuga. Do accidente, que tivera lugar entre as 11.30 e as 12.30 horas do 26 de marzo, tívose coñecemento pola denuncia do propietario dun dos vehículos que estaba estacionado na rúa Rosalía de Castro, ao cal o outro vehículo, un Renault Captur rompéralle un espello. O equipo de Atestados localizou e requeriu ao condutor causante dos danos para que prestase declaración en relación con estes feitos.

- Ás 09.00 horas do 26 de marzo, unha patrulla interceptou un vehículo que circulaba en dirección contraria no lugar de Palavea. O condutor non obtivera nunca o permiso de conducir, polo que foi denunciado ao xulgado de garda por un delito contra a seguridade viaria. Así mesmo, o condutor arroxou uns resultados positivos nas probas de alcoholemia (0,49 mg/l e 0,49 mg/l), polo que foi denunciado administrativamente cunha multa de 1.000 € e 6 puntos.

- Ás 11.00 horas do 26 de marzo, un condutor deu positivo en anfetaminas nun control de drogo-alcoholemia no Paseo Marítimo. O condutor, un home de 44 anos, foi sancionado cunha multa de 1.000 € e 6 puntos de retirada do permiso de condución. O vehículo foi inmobilizado e trasladado ao depósito municipal.

- Ás 20.15 horas do 26 de marzo, o condutor dun vehículo denunciou que o 9 de marzo, ás 11.30 horas, na entrada do aparcadoiro de Matogrande, na rúa Enrique Mariñas, un turismo, da marca BMW, chocara contra o seu turismo, un AUDI A5, sen deterse para facilitar os seus datos. O equipo de Atestados localizou ao presunto causante do accidente de tráfico sen feridos da clase "raspado" e espérase que compareza en dependencias policiais para o esclarecemento dos feitos.

- Ás 22.30 horas do 26 de marzo, unha dotación detectou un turismo circulando de maneira errática pola rúa Vereda da Polvorín. O condutor deste vehículo arroxou uns resultados positivos nas probas de alcoholemia (1,14 e 1,10 mg/l), polo que foi denunciado ao xulgado por un delito contra a seguridade viaria. O vehículo foi inmobilizado e trasladado ao depósito municipal.

- Ás 23.50 horas do 26 de marzo, un condutor que cirbulaba pola avenida Fernández Latorre, arroxou uns resultados positivos nas probas de alcoholemia (0,41 e 0,38 mg/l) polo que foi sancionado administrativamente con 1.000 € e a retirada de 6 puntos no seu permiso de conducir. O vehículo foi inmobilizado e trasladado ao depósito municipal como medida cautelar de seguridade viaria.

- Ás 00.10 horas do 27 de marzo, o condutor dun vehículo, que circulaba pola avenida dos Mallos dun xeito irregular, arroxou uns resultados positivos nas probas de alcoholemia (0,83 e 0,87 mg/l), polo que foi denunciado ao xulgado por un delito contra a seguridade viaria. O vehículo foi inmobilizado e trasladado ao depósito municipal.

- Ás 01.50 horas do 27 de marzo, un condutor que circulaba pola rúa Juan Flórez, arroxou un resultado positivo en cocaína nas probas de drogas polo que foi sancionado administrativamente con 1.000€ e a retirada de 6 puntos no seu permiso de conducir. O vehículo foi inmobilizado e trasladado ao depósito municipal.

- Ás 03.30 horas do 27 de marzo, unha patrulla deu o alto na avenida de Arteixo a un vehículo ao que lle figuraba a ITV caducada e comprobou a falta de vixencia do permiso do condutor, pola perda total dos puntos asignados legalmente. O condutor foi denunciado ao xulgado por un delito contra a seguridade viaria e o vehículo foi inmobilizado e trasladado ao depósito municipal.

- Ás 05.10 horas do 27 de marzo, un condutor arroxou uns resultados positivos nas probas de alcoholemia (0,66 e 0,62 mg/l), realizadas na avenida Pedro Barrié de la Maza, polo que foi sancionado administrativamente con 1.000 € e coa retirada de 6 puntos no seu permiso de conducir. O vehículo foi inmobilizado e trasladado ao depósito municipal.

- Ás 05.45 horas do 27 de marzo, unha dotación deu o alto a un vehículo que circulaba por unha zona prohibida da rúa Orzán, á altura do número 196. O condutor, un home de 32 anos, arroxou uns resultados positivos nas probas de alcoholemia (0.89 e 0.85 mg/l), polo que se lle tramitaron dilixencias ao xulgado de garda por un delito contra a seguridade viaria. O vehículo que conducía, un AUDI A3, foi inmobilizado e trasladado ao depósito municipal, como medida cautelar de seguridade viaria.

CONTROIS PREVENTIVO- DISUASORIOS DE SEGURIDADE CIDADÁ

- Ás 01.20 horas do 25 de marzo, unha dotación indentificou a un home, de 48 anos, na confluencia das rúas Juan Flórez e Alfonso Molina, por faltar ao respecto e consideración á patrulla no exercicio das súas funcións. Tamén se lle interveu unha arma branca e unha porción dunha substancia, posiblemente marihuana, polo que foi denunciado por dúas infraccións á Lei de protección da seguridade cidadá, ao portar unha substancia e un obxecto prohibido nun espazo público.

- Ás 00.40 horas do 25 de marzo, unha patrulla denunciou a dous menores, de 14 e 17 anos, aos que se lles interveu dúas porcións de haxix, infrinxindo así a Lei de protección de seguridade cidadá.

- Ás 06.20 horas do 25 de marzo, unha patrulla denunciou a un mozo, de 21 anos, que estivera implicado nunha pelexa na rúa Cordelería, ao incautárselle unha porción de haxix, infrinxindo así a Lei de protección de seguridade cidadá.