O PSOE mostra unha vez máis o seu apoio ás e aos atletas coruñeses e acompañará esta tarde, a partir das 19.15 horas, as persoas deportistas que hoxe acoden ao parque de Oza a adestrar ante o atraso que acumulan as obras das instalacións de Elviña.

Os/as atletas non dispoñen de pista para poder adestrar debido ás obras que se fan no campus de Elviña, polo que se ven obrigados a buscar espazos alternativos para a súa preparación. É por iso que regularmente acoden ao parque de Oza para estes adestramentos. Hoxe, os socialistas acudiremos a este adestramento para mostrar o noso apoio e para esixir celeridade nos traballos.

É certo que as choivas influíron no atraso, pero tamén é certo que non se buscaron alternativas nin se aproveitaron os días bos para acelerar os traballos no campus de Elviña. De feito, non hai instalacións na cidade e só algúns atletas, os que teñen medios para iso, desprázanse ás pistas do INEF en Bastiagueiro.

Esta falta de medios contrasta co feito de que este fin de semana acoden catro atletas ao Campionato de España de 5.000 e 10.000 metros.