O Grupo Municipal Socialista e a Asociación de Veciños de San Pedro de Visma mantiveron unha reunión coa dirección da Edar de Bens para formular unha serie de demandas referidas ao tráfico de vehículos pesados que a diario pasan polo barrio. Froito deste encontro a dirección da planta comprometeuse a realizar un maior control sobre os camións e facilitou un número de teléfono de contacto directo para atender calquera aviso da veciñanza.

Os residentes en Visma queixáronse do tráfico pesado na zona que provén da EDAR, son uns mil camións ao ano que pasan polo barrio cos lodos. Así mesmo, advertiron sobre as vibracións que producen e que nalgunha ocasión puntual prodúcense perdas que se verten na vía. Desde a EDAR sinalaron que non tiñan coñecemento, debido a que os camións van precintados, pero en todo caso comprometéronse a extremar a seguridade do transporte co fin de evitar as molestias.

Con ánimo de dar resposta adecuada ás demandas veciñais, a EDAR facilitou un teléfono directo para que a veciñanza poida chamar no caso de que xurda calquera incidencia ou para responder a calquera demanda con respecto a isto.

Na mesma liña, as veciñas e os veciños de Visma formuláronlle ao PSOE a posibilidade de dar continuidade ao Paseo Marítimo entre O Portiño e Bens, de tal forma que esta vía se puidse utilizar para desviar os camións e evitar o seu paso polo medio do barrio. O Grupo Socialista recolleu esta proposta veciñal, que coincide co anhelo de completar o Paseo Marítimo, e o portavoz socialista, José Manuel García, propuxo incorporar este proxecto ao orzamento municipal aproveitando o superávit.

Na reunión coa Edar de Bens e a asociación de veciños, que preside Fernando Fernández, valoráronse como positivas todas estas iniciativas. O portavoz socialista, que estivo acompañado pola edil e conselleira da EDAR, Pilar Neira, transmitiu a satisfacción por dar resposta útil ás demandas veciñais e destacou a proposta para completar o Paseo Marítimo.