A concellería de Mobilidade comunicou esta mañá que as rúas Compostela, Alcalde Marchesi e Primavera serán peonís en Nadal. O corte ao tráfico do 20 de decembro ao 6 de xaneiro permitirá unha maior mobilidade das persoas nunhas zonas de intensa actividade comercial, tal e como explicou o edil de Urbanismo, Juan Díaz Villoslada. A peonalización arrinca este venres coa montaxe do operativo. Así, desde as oito da mañá estará prohibido estacionar nas tres rúas.

A rúa Compostela quedará totalmente cerrada ao tráfico, mentres que en Alcalde Marchesi só se verá afectado o tramo que vai da avenida de Fernández Latorre a Ramón y Cajal; na rúa Primavera cerrarase o tramo entre a avenida de Oza e a rúa Alcalde Marchesi. O concello, co fin de garantir o uso peonil das rúas, situará varios elementos de granito e xardineiras nas entradas destas, así como sinalización vertical e horizontal.

A área de Mobilidade explicou que se permitirá o paso de camións na rúa Compostela para realizar labores de carga e descarga, de luns a domingo en horario restrinxido de 8.00 a 11.00 horas e se respectará a reserva comercial os mércores e domingos de 22.00 a 24.00 horas. En canto a rúa Alcalde Marchesi, permitiráse o acceso ao único garaxe existente desde Benito Blanco Rajoy con saída a Ramón y Cajal, e para compensar a perda de zonas de carga e descarga nesta rúa, ampliaranse as zonas na rúa Blanco Rajoy. Ademais está previsto que se instalen bancos ao longo da vía.

Doutra banda, co fin de que as persoas residentes na rúa Primavera non perdan as súas prazas de aparcamento debido a peonalización, o concello trasladará as ditas prazas de maneira temporal á avenida de Oza.

En canto á recollida de lixo, para evitar que os camións circulen polas rúas, trasladaranse os contedores aos extremos das vías.