A reforma da rúa Observatorio, unha obra enmarcada dentro do plan Urbana C, arrincan este mércores, día 15 de outubro, segundo informou hoxe mesmo o Goberno municipal, a través da Concellería de Infraestruturas. O Concello coruñés inviste nesta actuación, que ten un prazo de execución de 3 meses, un total de 69.477,84 euros.

Este novo proxecto na Agra do Orzán inclúese tamén no investimento impulsado polo equipo de goberno co fin de mellorar espazos públicos no barrio. Para a reforma da rúa  Observatorio presentáronse 27 propostas. Finalmente, adxudicouse a Excavaciones J. Cancela Esmorís por 69.477,84 euros -o que supuxo unha rebaixa de 38.731,50 euros, un 35,8%, con respecto ao orzamento de licitación-, segundo a información facilitada polo Consistorio.

O proxecto da rúa Observatorio recolle a creación dunha plataforma única para favorecer a comodidade do usuario, con beirarrúas e vaos peonís máis amplos para mellorar a accesibilidade, seguindo así as directrices que xa se fixaron noutras actuacións de similares características, como a reforma integral da rúa Cuba. "Na actualidade, a rúa Observatorio conta con dúas beirarrúas estreitas que dificultan a mobilidade peonil", admite o Goberno local.

A nova intervención urbanística que desenvolverá a Concellería de Infraestruturas dentro do plan Urbana C tamén permitirá contar con máis árbores e novo mobiliario urbano na contorna da rúa Observatorio. Ademais, dotarase a vía de rede separativa de saneamento e canalizacións para iluminación e telecomunicacións das que carecía. Ademais, recolleranse as augas pluviais procedentes das baixantes dos inmobles, así como a instalación dunha rede nova de sumidoiros  que recollan a auga de choiva.

Fonte: La Opinión A Coruña