Nesta ocasión, temos unha cita coa poesía de Dan Coman e Manuel Darriba.

Nado en 1975 na localidade transilvana de Gersa, Dan Coman estase a converter nun dos principais representantes da poesía romanesa contemporánea.

O seu primeiro libro saiu publicado en 2003 baixo o título de O ano da toupa amarela (cunha segunda edición en 2004), e axiña resultou galardoado co Premio de debut da Unión de Escritores da Romanía e mais co Premio Nacional de Poesía Mihai Eminescu Ópera Prima. Tras este comezo fulgurante, viñeron outros exitosos poemarios coma Ghinga (2005), O dicionario Mara (2009), A parroquia (2012) ou O matrimonio (2015). A eles sumouse en 2017 O insectario Coman, último libro de poemas até a data, que vén de ser traducido ao castelán por Elena Borrás para a editorial La Bella Varsovia (2019). Existen tamén dúas antoloxías do seu traballo, con poemas reunidos baixo os títulos d great coman (2007) e ERG (2012). Así mesmo, Coman é autor da obra en prosa Irresistible (2010).

Poemas seus foron traducidos ao castelán, inglés, esloveno, húngaro, francés, serbio, sueco e alemán. Recibiu ademais numerosos premios, entre os que salientan o Premio Radio Romanía Cultural ou o Vilenica Crystal Prize de Slovenia. Dende o ano 2008 é un dos organizadores do Festival de Poesía e Música de Cámara "Poezia e la Bistriţa" [A poesía está en Bistriţa].

Manuel Darriba (Sarria, 1973) é narrador, poeta e guionista. Licenciado en Xornalismo e Filosofía; en medios impresos de ámbito galego e estatal exerceu durante anos unha actividade xornalística pola que recibiu un bo número de galardóns. Posteriormente fundou e dirixiu unha empresa editora de revistas técnicas, e dende o 2011 dedícase en exclusiva á escrita.

Debutou na poesía en 1997, e a Calor seguiulle en 2006 Vostede non sabe con quen está a falar, galardoado co Premio Espiral Maior. En 2010 Os indios deixaron os verdes prados faise co Premio González Garcés e, finalmente, Santa morte ve a luz hai só uns meses. Darriba é igualmente autor das novelas O bosque é grande e profundo -nomeada ao Premio de Novela Europea Casino de Santiago- Velada do billarista -galardoada co Lueiro Rey- e mais Accidental, as tres tamén vertidas ao castelán. Ademais, outros cinco títulos -dirixidos ao público adulto, xuvenil ou infantil- completan unha bibliografía en prosa que o pasado ano culminou co volume de relatos Elefante (2018). Para rematar, como guionista ten escrito para unha chea de programas e series da TVG como Serramoura, O Faro, Malo será!, Land  Rober Tunai  Show, Fontealba, Vidago Palace, A estiba, O sabor das margaridas, etc. Ademais, o máis recente dos tres filmes documentais que dirixiu -Pacios. As fotos da memoria- exhibiuse xa en festivais de Europa e América e pode verse íntegro na rede.