Cales son os horarios de atención ao público?

Iremos aos poucos recuperando a normalidade que era habitual nas bibliotecas, e farémolo garantindo tanto a seguridade do público que nos visita como a do persoal. Agora mesmo estes son os horarios de atención ao público.

Que servizos están dispoñibles neste momento?

• Servizo de devolución
• Servizo de préstamo con cita previa

Nos nosos espazos virtuais hai unha completa programación de diversa temática e difusión de información cada día.

Cando abran as bibliotecas, vou poder acceder ás súas instalacións libremente?

NON. Haberá zonas acoutadas unicamente para o servizo de préstamo e o estudo e a consulta en sala. Para entrar terás que observar unhas normas de hixiene (desinfección de mans) e seguridade.

Cando poida acceder á biblioteca, teño que ir con luvas e máscara?

É obrigatorio o uso de máscara no interior dos espazos públicos por orde ministerial, pero non se require o uso de luvas para acceder ás nosas instalacións.

Á entrada da biblioteca temos a disposición de todas as persoas usuarias un dispensador de xel hidroalcohólico para unha limpeza eficaz das mans, sen necesidade de aclarado. É obrigatorio usalo ao entrar e recomendable ao saír.

Necesito ser socio/a para usar os servizos da biblioteca?

Necesitas dispoñer dun carné para levar materiais en préstamo da biblioteca, ou a Tarxeta Millennium activada na biblioteca. Facerte socia/o é gratis e podes facelo a través do seguinte formulario.

O resto de servizos para os que se necesita carné non están a funcionar polo de agora.

Como podo consultar a colección para solicitar un préstamo?

A través da páxina web podes acceder ao OPAC (catálogo da colección en liña) e buscar os materiais que che interesan (por autor/a, título, palabra clave etc.). Tes libros, CDs, películas, música, cómic etc.

Tamén podes chamar á túa biblioteca máis próxima e as bibliotecarias e bibliotecarios axudaranche e asesorarante por teléfono. En función dos teus gustos e intereses recomendaranche lecturas, películas, cómic, música etc.

Cando podo devolver os materiais que teño na casa desde antes do confinamento?

Terás que achegarte á biblioteca onde colliches o material e depositalo na caixa ou no espazo habilitado que teñan disposto para iso.

Podo devolver os libros dunha biblioteca noutra diferente?

NON. Tes que devolver os materiais na biblioteca onde colliches o préstamo.

Cantos materiais podo coller en préstamo e durante canto tempo?

15 materiais durante 1 mes, coa posibilidade dunha prórroga de 10 días só nos libros e DVDs documentais.

Se o libro está prestado, podo pedir que mo reserven?

NON, durante o tempo que dure esta situación non se van poder facer reservas sobre os libros que están prestados. Así evitamos que os tempos de espera se dilaten para que o libro volva estar dispoñible, tendo en conta o tempo de corentena.

Cando faga a petición de préstamo, como fago para recollelo?

O material quedará bloqueado pola persoa usuaria que fai a petición. Darémosche unha franxa horaria para que pases a recollelo. No momento en que acudas á biblioteca, o material estará xa preparado no mostrador para que cho entregue o persoal da biblioteca e esteas o menor tempo posible dentro das instalacións.

Cando vaia recoller o material, teño que levar o carné?

SI. Ensina o carné físico, virtual (MOPAC), Tarxeta Millennium ou DNI (se te fixeches socia/o recentemente e non dispós de carné) e dá os teus datos en voz alta. Por precaución, o persoal das bibliotecas non van tocar os carnés das persoas usuarias.

Cando recolla o material, vai estar desinfectado debidamente?

SI, todos os libros e materiais da biblioteca de acceso ao público foron desinfectados. Cada vez que se devolve un libro, este pasa un período mínimo de corentena de 14 días antes de dispoñelo novamente para o préstamo.

Ao chegar á biblioteca con cita previa, que teño que facer?

Sigue as indicacións do persoal ou os carteis habilitados para a ocasión. Sitúate fóra, na zona habilitada para a espera. Mira os adhesivos do chan. Lembra que tes que gardar 2 metros de distancia de seguridade co resto de usuarias/os.

Cando o persoal da biblioteca cho indique (ou cando saia a persoa usuaria anterior) desinfecta as mans no dispensador que hai dispoñible na entrada e entra ata a mesa de recollida de material. Terémoscho xa preparado para que o leves para a casa no menor tempo posible. Daranse citas cada dez minutos. Atenderase por hora de chegada.

Podo ir recoller o material sen cita previa?

NON. Esta norma estableceuse para evitar aglomeracións e tempos de espera moi longos. Ademais, así permítenos cumprir mellor coas medidas de seguridade e hixiene establecidas.

Se levo material para devolver e vou con cita previa tamén para recoller, podo entregar o material no mostrador cando me toque a quenda?

NON, o material para devolver teralo que depositar nas caixas de recollida da entrada. Non entres con eles na biblioteca.

Lembra: os préstamos e as devolucións faranse sempre na mesma biblioteca. 

Vou poder usar os baños do edificio?

Os baños estarán clausurados para o público. Só se habilitarán para situacións de extrema necesidade.