Por mor da pandemia da COVID-19 e ás recentes medidas restritivas que afectan ás actividades culturais ditadas polas autoridades sanitarias, e que supoñen unha redución a nove persoas por obradoiro, a empresa concesionaria do Progama de Ocio de Outono no Fórum Metropolitano e o Centro Ágora presentou a solicitude de suspensión do contrato ao pasaren de preto de 3.500 a 810 prazas. Deste xeito, o IMCE e mais o Concello da Coruña decidiron aprazar as actividades até que a situación epidemiolóxica mellore e poidan aumentar a capacidade nas clases.

O programa de ocio cultural e social que promove o Concello nestes dous centros ten como obxecto darlles alternativas ao tempo libre aos e ás cidadás con propostas innovadoras e actividades culturalmente enriquecedoras e que permitan realizar unha acción compensatoria que favoreza a poboación con menos recursos formativos. Confórmase de obradoiros e clubs pensados para a adquisición de capacidades, que fomenten a convivencia e a sociabilidade das e dos participantes, potenciando a relación e atendendo á diversidade e á integración das persoas.