O próximo mércores 15 de decembro, no Fórum Metropolitano, temos a presentación do libro "¿Lidia o Vitoria?" de Luis M. Gurriarán publicado por Punto Rojo Libros.

Luis M. Gurriarán Rodríguez:

O Barco de Valdeorras (Ourense) 1948. Aos seus máis de 72 anos segue pensando que é aprendiz de todo e mestre de nada. A súa vida profesional transcorreu en postos de responsabilidade e como empresario de varias sociedades relacionadas co turismo e a hostalaría. Colaborou profesionalmente á apertura actual da Residencia de Estudantes de Madrid. Foi Presidente da Asociación Provincial de Hoteis e Directivo da Confederación de Empresarios, Cámara de Comercio e ATUDEM. Actualmente xubilado é Vicepresidente da Fundación FONTE, sen ánimo de lucro, de axuda a novos emprendedores.

Defensor sen concesións dos Deberes e Dereitos das persoas e da Liberdade, segue estudando e participa en aulas, talleres e foros de discusión.

Tras a súa Novela Histórica"La Ruta de las Estrellas", unha guía de viaxe "Rutas por Galicia" e "La verdadera Historia de la Puta Mili", agora pon a disposición do lector a novela "¿Lidia o Vitoria?".

Sinopse:

Lidia é unha muller que tras unha serie de vivencias normais de adolescencia e mocidade deixa os seus estudos para casar, traslada o seu lugar de residencia por esixencia laboral do seu marido e pasa dunha etapa de felicidade absoluta coa súa parella aos malos tratos. Nunca renuncia a refacer a súa vida.

Entre unha serie de casuais e estrañas circunstancias cambia de nome, de identidade, de cidade, de relacións e costumes, aínda que sempre hai algo que lle fai volver sobre o seu pasado.

A maior parte da trama distribúese especialmente entre Madrid, Las Palmas e París.

A través da novela discorre a vida de maltratada e maltratador narradas en primeira persoa cara a un desenlace sorprendente.