29 de xullo de 2022
A meta estará na praza de María Pita, á que se accederá previo paso pola rúa Real e Rego de Auga
O 2 de outubro regresa o maratón atlántico Coruña42 coa súa novena edición, un circuíto novo e un atractivo final na Praza de María Pita .
Despois da pandemia, o calendario atlético da cidade recupera a súa proba grande, a irmá maior da C10 e a C21, que reaparece cun enorme esforzo organizativo. O obxectivo do Goberno local é situala, novamente, entre as mellores de España e que sexa un patrimonio máis da Coruña.
O maratón poñerá a proba a resistencia dos/as deportistas con 42.195 metros polas rúas herculinas, onde, ademais, celebrarase, en paralelo, unha 10K.
O circuíto, que partirá da avenida de Montoto, presenta tres tramos diferenciados.
No primeiro, unha volta de 14.695 metros na que os/as atletas pasarán pola Mariña, os Cantóns, a praza de Ourense, dirixiranse cara á Palloza, enfilarán a avenida do Exército, pisarán rúas como Ramón y Cajal, Pérez Ardá ou Salvador de Madariaga, onde efectuarán un xiro de 180 graos, despois chegarán á zona portuaria e regresarán cara ao punto de saída.
Alí comezará o segundo tramo, que repite o primeiro e engade case 3 quilómetros por Salgado Torres, ata a rotonda de Lonzas. Nese punto virarase para tomar de novo dirección cara ao Porto e regresar á Avenida de Montoto.
A continuación, dez quilómetros finais cun percorrido pola zona de praias tras atravesar Juana de Veiga, San Andrés e Rúa Alta. Os/as deportistas correrán primeiro cara a Manuel Murguía e, posteriormente, en sentido á Torre de Hércules antes de afrontar os últimos metros por Sol, San Andrés e Rúa Nova, acceder á rúa Real, Rego de Auga e, finalmente, a praza de María Pita, onde estará a meta.
Recupérase así a chegada a María Pita desde Rego de Auga, que só se rexistrou, con moi boa aceptación por parte dos/as atletas, na edición de 2015.
Os circuítos da C42 e a 10K paralela estarán homologados pola Real Federación Española de Atletismo a finais de agosto ou principios de setembro.
A proba menor aproveita os dez quilómetros finais do maratón, pero os/as atletas de ambas as probas non coincidirán no asfalto.
O prazo de inscrición ordinario na web www.carreirasgalegas.com está aberto ata o domingo 18 de setembro ás 23.59 horas e o extraordinario, desde o luns 19 de setembro ao domingo 25 dese mes, unha semana antes da carreira, tamén ás 23.59 horas
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible