Este autor, ademais do seu traballo fotográfico, recibiu o Premio de Creación Literaria na Universidade da Coruña en tres ocasións consecutivas (2012, 2013 e 2014), e algún do seus relatos e poemas foron publicados en diferentes publicacións nacionais.

"Haikus", composta por 40 fotografías tomadas ao longo do ano 2017,  é unha exposición concibida á maneira dun diario de viaxe. Un diario fragmentario e tranquilo, afastado de toda présa e de toda vontade documental, no que os lugares e as circunstancias vitais do seu autor carecen de importancia. Como na poesía xaponesa, as imaxes de haikus caracterízanse pola súa abstracción e a súa sinxeleza. Pola súa exaltación deses momentos da vida nos que non sucede nada.

Esta exposición quere celebrar esa beleza. A beleza que se esconde detrás de todo o banal.

A sala Plataforma14, pertencente á Concellaría de Participación e Innovación Democrática e coordinada polo Centro Municipal de Información Xuvenil, pretende visibilizar a creación realizada polos/as artistas emerxentes da nosa cidade.

Toda a información sobre este espazo pode atoparse na web www.coruna.gal/cmix/plataforma14