Consiste en traballar baixo a contratación e directrices dunha persoa empresaria. Caracterízase polo seguinte:

• A persoa traballadora percibe unha retribución ou salario.
• Traballa baixo dependencia allea, isto é, a empresa ou empresaria/o será quen determine todo o relacionado co traballo (servizos, xornada laboral, horario etc.).
• O contrato poderase formalizar por escrito ou de palabra. Cando se realice de palabra, tanto a persoa empresaria como a traballadora poden esixir que o contrato se realice por escrito mesmo durante o transcurso da relación laboral. Deberanse realizar por escrito aqueles que así o esixa unha disposición legal. De non observarse tal esixencia, o contrato presumirase realizado por tempo indefinido e a xornada completa, salvo proba en contrario que acredite a súa natureza temporal ou o carácter a tempo parcial dos servizos.

TIPOS DE CONTRATO

Existen distintas modalidades de contratación, atendendo ás súas especiais características de duración, requisitos das partes contratantes etc., así como medidas de fomento do emprego. As máis habituais son:

• Contrato indefinido

É aquel que se concerta sen establecer límites de tempo na prestación dos servizos, en canto á duración do contrato.

Máis info

• Contrato de obra ou servizo determinado

É o que se concerta para a realización dunha obra ou prestación dun servizo, con autonomía e sustantividade propia dentro da actividade da empresa e cuxa execución, aínda que limitada no tempo, sexa en principio de duración incerta.

Máis info

• Contrato para a formación e a aprendizaxe

O contrato para a formación e a aprendizaxe ten por obxecto a cualificación profesional do persoal traballador nun réxime de alternancia de actividade laboral retribuída nunha empresa con actividade formativa recibida no marco do sistema de formación profesional para o emprego ou do sistema educativo.

Máis info

• Contrato en prácticas

Ten como finalidade facilitar a obtención da práctica profesional adecuada ao nivel de estudos cursados polas persoas traballadoras con título universitario ou de formación profesional de grao medio ou superior ou títulos recoñecidos oficialmente como equivalentes ou de certificado de profesionalidade que habiliten para o exercicio profesional. Non poden transcorrer máis de cinco anos desde a terminación dos correspondentes estudos, ou de sete anos cando o contrato se concerte cun/ha traballador/a con discapacidade. En caso de primeiro emprego de mocidade menor de 30 anos, poderase realizar este tipo de contrato aínda que transcorresen 5 ou máis anos. A duración do contrato non poderá ser inferior a seis meses nin exceder de dous anos.

Máis info

Se queres coñecer outros tipos de prácticas preme aquí.

Para máis información sobre contratos laborais, consulta a Guía de contratos que publica todos os anos o SEPE.