O Concello da Coruña, a través da súa Concellaría de Comercio, Mercados e Barrios, conmemora este 11 de novembro o Día do Comercio Local. O acto central desta nova campaña será unha exposición itinerante de ilustracións do debuxante Jorge Blanco sobre os comercios tradicionais da cidade e a súa historia.

A concelleira de Comercio, Mercados e Barrios, Diana Sobral Cabanas, presidiu a presentación desta mostra na súa primeira parada, no Obelisco. O seu obxectivo é dar a coñecer a historia e importancia do noso comercio local a través do recordo de parte dos nosos establecementos máis emblemáticos e icónicos.

"Esta é unha campaña do Goberno de Inés Rey para fomentar a compra no noso comercio local a través da memoria de todos aqueles establecementos da cidade que foron marcando a nosa historia e a da nosa veciñanza e a relación emocional co noso pequeno comercio local, que leva décadas contribuíndo a facer cidade", apuntou a concelleira. Esta exposición complementarase co reparto entre o tecido comercial da cidade de libros coas ilustracións elaboradas por Jorge Blanco, que serán repartidos entre a clientela no momento da compra.

Esta exposición itinerante contará con 15 localizacións en zonas comerciais da cidade e estará entre dous e tres días en cada lugar para, a continuación, ser trasladada ao seguinte punto. A maiores, para complementar as accións levadas a cabo neste día polo Goberno de Inés Rey para fomentar o consumo en comercios locais, lanzouse unha campaña de vídeo nas redes sociais do Concello e da Concellaría de Comercio, que se pode ver na seguinte ligazón.

A ruta da exposición será a seguinte:

• 11 novembro: Obelisco
• 14 novembro: praza entre a rúa Santiago e a rúa Dársena
• 16 novembro: Campo da Leña
• 19 novembro: praza de Lugo
• 22 novembro: praza de Pontevedra
• 24 novembro: praza da Tolerancia
• 26 novembro: praza Elíptica
• 29 novembro: praza das Conchiñas
• 1 decembro: explanada do Palacio da Ópera
• 4 decembro: rúa Anxo Senra
• 7 decembro: rúa peonil da Gaiteira (esquina coa avenida de Oza)
• 10 decembro: rúa Pablo Picasso coa rúa María Casares
• 12 decembro: praza de Enrique Mariñas
• 14 decembro: praza de Pablo Iglesias
• 16 decembro: avenida de Novo Mesoiro (esquina coa rúa Laxe)
• 19 decembro: fin da exposición.