19 de junio de 2021
A OMIC ofrecerá nos seus obradoiros un xogo interactivo co que pretende fomentar unha utilización correcta das redes sociais e mais un manual para lles concienciar ás lectoras e aos lectores sobre os hábitos de consumo
A OMIC empregará como material didáctico dentro dos seus obradoiros un novo xogo interactivo co que pretende fomentar o bo uso da internet e das redes sociais entre as xeracións máis mozas e un manual en que promoverá a alimentación saudable. A concelleira de Comercio, Mercado, Consumo e Barrios, Diana Cabanas, destaca que ambas as novidades formarán parte dos diferentes programas educativos co fin de atender mellor as necesidades do alumnado e facilitarlle a súa aprendizaxe con actividades prácticas que invitan á reflexión. Unha das premisas deste Concello canto á xente máis nova é precisamente informarlle sobre cuestións que lle atañen no seu día a día como o consumo responsable das novas tecnoloxías ou a alimentación nas idades máis temperás.
Xogo interactivo
En concreto, este proxecto interactivo permitirá que a mocidade resolva misións en equipo e sociabilice nunha forma de aprender e se divertir ao mesmo tempo. Dun xeito motivador, as personaxes daranlles ás xogadoras e xogadores unha serie de pautas sobre o bo uso da internet e das redes sociais e tras rematar, farase unha análise dos resultados. O xogo está dispoñible en galego e castelán na web https://estaticos.coruna.gal/omic-juego
Canto ao manual, esta publicación que se usará en obradoiros e itinerarios formativos recolle información referida aos dereitos e deberes das persoas consumidoras na alimentación saudable e na nutrición. Está dirixida ás mozas e mozos de entre os 12 e 16 anos para que coñezan cuestións como as necesidades e problemas nutricionais máis habituais, os riscos dunha mala alimentación, os diferentes tipos de alimentos, vantaxes do comercio de proximidade na alimentación saudable, ou publicidade e falsos mitos.
Con máis de 35 actividades prácticas e a través de ilustracións e imaxes, as lectoras e lectores disporán de recursos suficientes como para recoñeceren hábitos de vida saudables e isto servirá para que sexan máis críticas/os e reflexivas/os con respecto ao que comen ou mercan.
A OMIC repartirá 1.000 unidades deste manual entre a mocidade, que tamén está dispoñible en soporte dixital en galego e castellano.
Así mesmo, a OMIC elaborou un cartafol para o profesorado que inclúe os obxectivos educativos, a metodoloxía e as respostas aos exercicios detallados no manual co obxecto de que se divulguen nos colexios os bos hábitos de consumo na alimentación.
Lo sentimos pero tu navegador es muy antiguo para poder mostrar esta página. Debes de actualizarlo o usar un navegador compatible. Hemos optimizado esta web para Google Chrome, Mozilla Firefox, Opera, Safari y Microsoft Edge. Instalar ahora un navegador compatible