Os de Boston iniciaban a súa exitosa carreira en 1986 e foron un deses grupos que marcaron o camiño para seguir, sendo unha referencia recoñecida por multitude de grupos e artistas que xurdiron posteriormente (entre moitos outros, Kurt Cobain, fan confeso da banda, que falaba da grande influencia que o grupo exerceu en Nirvana). Con 7 discos ás súas costas, deixaron un legado de cancións que calquera amante do rock, pop, indie, e da música en xeral, recoñece ao instante. Algúns dos seus traballos como os idolatrados "Surfer Rosa" ou "Doolittle" foron elixidos por prestixiosas publicacións como Rolling Stone, Q magazine ou Melody Maker entre a lista dos mellores discos de todos os tempos.

Despois de separarse en 1993 e cun parón que durou case 11 anos, a súa volta en 2004 supuxo todo un acontecemento e aumentou aínda máis a percepción de "banda de culto" sobre eles. Os Pixies actuaron nos principais escenarios do planeta e festivais de medio mundo peléxanse por telos na súa programación cada vez que saen de xira.

Tras os seus recentes shows en USA compartindo cartel con Weezer, a mítica formación americana anuncia tour europeo para presentar o seu novo disco e repasar un repertorio infestado de hits. Chegarán en outubro a España, onde actuarán unicamente en 3 cidades: Madrid, Barcelona e A Coruña, no que será o primeiro concerto que realiza o lendario grupo en Galicia.

VENDA DE LOCALIDADES

Despacho Central da praza Ourense: de luns a venres (excepto festivos) de 9.30 a 13.00 e de 16.30 a 19.30 h

Despacho do Coliseum: aberto só os días de concerto desde as 17.00 h ata o inicio do concerto (só se hai localidades dispoñibles)

Televenda: 902 044 226 (de luns a venres de 9.00 a 22.00 h; sábados de 14.00 a 22.00 h; domingos de 16.00 a 21.00 h) ou web