"Lo que ocurre en las Vegas, no siempre se queda en las Vegas. La estupidez" é unha obra de Rafael Spregelburd que versa sobre a fraxilidade da intelixencia nos tempos que corren. Un grupo de persoas intenta facerse rica nas Vegas. Un método matemático para gañar á ruleta garda relación coa temible ecuación matemática que encripta o segredo da Apocalipse. Dous criminais deben vender un cadro antigo roubado antes de que se termine de deteriorar por completo. A mafia siciliana fabrica unha nova estrela do pop e uns policías motorizados viven unha intensa historia de traizóns.

Todo isto ocorre ao mesmo tempo. E nas Vegas. Sorte de road-movie, pero en formato teatral, "La estupidez" naceu como encargo a Spregelburd en agosto de 2000 polo prestixioso Deutsches Schauspielhaus de Hamburgo. A partir de aí, a obra espertou curiosidade e interese en diversos ámbitos: recibiu o Premio Tirso de Molina en España en 2003. Foi seleccionada para a súa tradución polo National Theatre de Londres, e representouse en numerosas prazas importantes en todo o mundo, como a Schaubühne de Berlín, o Theaterhaus de Stuttgart e o Teatro Helénico de México, entre outros.

"La estupidez" é parte da "Heptalogía" de Hieronymus Bosch, un grupo de sete obras sobre o tema dos pecados capitais. Parte do atractivo do espectáculo é que os cinco actores do grupo dan vida aos 24 personaxes. "Lo que ocurre en las Vegas, no siempre se queda en Las Vegas".

Con Fran Perea, Toni Acosta, Ainhoa Santamaría, Javi Coll, Javier Márquez.

Dirección: Fernando Soto

Compañía: Feelgood Teatro.

Venda de entradas:

Despacho Central, praza de Ourense: de luns a venres de 9.30 a 13 e de 16.30 a 19.30 h

Despacho do Teatro Rosalía: só días de función de 16 a 20 h

Televenda: 902 044 226 e Internet