O Fórum Metropolitano acollerá un ano máis o ciclo Cinenterraza, que cumpre unha década do seu formato 'Cult Movies', con proxeccións de títulos lendarios de todas as épocas e estilos en 35 mm para gozar do cinema no formato no que foi concibido. Incluiranse de novo os coloquios, nos que participarán convidados de primeira liña do ámbito da dirección, a produción, a interpretación, a literatura ou o xornalismo especializado e a divulgación. Ademais, tras as restricións pola pandemia nas últimas dúas edicións, volverase á capacidade habitual e en formato terraza, con posibilidade de consumo de bebidas. 

As entradas poden adquirirse en www.ataquilla.com, así como no despacho de billetes da praza de Ourense (agás festivos): de luns a venres de 11.00 a 15.00 h e de 16.30 h a 19.30 h, e no despacho de billetes do Fórum desde unha hora antes do comezo do espectáculo (sempre que queden entradas dispoñibles). O prezo será de 3 euros por entrada, e de 2 euros para carné Xove, maiores de 65 anos e persoas desempregadas.

O ciclo de cine de culto desenvolverase entre os días 6 e 28 de xullo, en oito sesións que comezarán ás 22.30 horas. Na primeira cita, mañá mércores, participará Carlos Ares, guionista, director e produtor, que presentará "Dracula" de Terence Fisher, obra magna da produtora Hammer. O xoves 7 será a escritora Blanca Riestra a encargada de presentar o western "Johnny Guitar" (Nicholas Ray, 1954) e de falar de arquetipos, mulleres e pistolas e da súa última novela, "Aquí comeza o mar". Na xornada do mércores 13 participará a actriz Cris Iglesias para falar de "Conte d'été" e dun dos mellores directores de actores, Eric Rohmer, e o xoves 14 a ilustradora Julia Lago acompañará o visionado dun dos filmes máis arrebatadores de Michael Powell e Emeric Pressburger,"Black Narcissus". 

A semana seguinte, na sesión do mércores 20 o xornalista musical Javier Becerra analizará a banda sonora de Ry Cooder para "Paris, Texas", outra auténtica obra mestra dirixida por Wim Wenders. O xoves 21 será o profesor de estética e escritor Alberto Ruiz de Samaniego o que guiará a viaxe á escuridade que é "The Fly", a obra mestra de David Cronenberg. Xa na semana final, o mércores 27 o cineasta de destacada traxectoria Alfonso Zarauza comentará o máis fermoso testamento cinematográfico de John Huston, "Dublineses". E para rematar o ciclo, a divulgadora científica Deborah García Bello, analizará o xoves 28 ese monumento á diversión que é "Robocop", de Paul Verhoeven.

Programa de filmes e conferenciantes convidados

• Mércores 6: Drácula (Terence Fisher, 1958). Convidado: Carlos Ares (guionista, director e productor) 
• Xoves 7: Johnny Guitar (Nicholas Ray, 1954). Convidada: Blanca Riestra (escritora).
• Mércores 13: Conte d'èté (Eric Rohmer, 1996). Convidada: Cris Iglesias (actriz) 
• Xoves 14: Black Narcissus (Michael Powell, Emeric Pressburger, 1947). Convidada: Xulia Lago (artista e debuxate de cómic) 
• Mércores 20: Paris, Texas (Wim Wenders, 1984). Convidado: Javier Becerra (xornalista musical). 
• Xoves 21: The Fly (David Cronenbegr, 1986). Convidado: Alberto Ruiz de Samaniego (escritor e filósofo). 
• Mércores 27: Dublineses (John Huston, 1987). Convidado: Alfonso Zarauza (cineasta).
• Xoves 28: Robocop (Paul Vewerhoeven, 1987). Convidada: Deborah García Bello "Deborahciencia" (química e comunicadora científica).