Recuperación da figura de destacadas integrantes femininas da cultura coruñesa a través da historia, nos ámbitos do deporte, as artes plásticas, as artes escénicas, a música e a literatura. Recreación da súa vida e obra dende o cabaré, nun espectáculo para todos os públicos con intención formativa e performativa. A través da comedia e o drama, e contando cunha equipa multidisciplinar, daráselles un lugar na memoria da cidade a estas mulleres pioneiras, tan necesarias como esquecidas. Un grupo de coñecidas artistas coruñesas será o encargado de lles dar vida ás nosas protagonistas, nun relevo xeneracional de mulleres a través da arte. Os puntos fortes do espectáculo serán unha estética elegante, coidada e orixinal, unha variedade de números sorprendentes e distintos, e o protagonismo absoluto da cidade da Coruña, berce de tantas mulleres bravas que fixeron unha historia que nosoutras, as coruñesas de hoxe, queremos continuar.